Libros a moreas

Tento e mailo seu amigo.

2012-02-29T12:39:00.003+01:00

Olalla e Marta ofrecéronos hoxe o conto dun can chamado Tento que fixo un amigo moi peculiar : un gato. Eran tan bos compañeiros que nada puido coa súa amizade. Mesmo comían xuntos sen rifar. A fin de contas ó can gústanlle os ósos e ó gato o peixe.

2012-02-29T12:39:00.000+01:00

¿ Aínda nada ?

2012-02-15T11:40:00.003+01:00

Sempre nace algo dunha semente? O protagonista do conto que nos relataron hoxe Miquel e Bruno non o ten tan claro. Non crece nada días tras día ? Alguén andara por ahí facendo algunha trampa? Quen sabe ... Será un paxariño?

NA AVENTURA DOS MUÍÑOS.

2012-02-08T12:06:00.003+01:00

Bernal e Xulián adentráronos hoxe no mundo dos cabaleiros. O protagonista do conto, un tal Breogán, introduciuse na historia de Don Quixote,vivindo unhas aventuras un tanto imaxinarias cuns muíños que semellaban xigantes.

¡ EU NON FUN !

2012-02-02T12:10:00.005+01:00

Hoxe, xoves, as nosas compañeiras Rosa e Sandra decidiron contarnos un conto un pouco enrevesado no que foron aparecendo varios animais que intentaban botarse a culpa uns a outros dun empuxón que recibira a protagonista.
En realidade o culpable fora unha vaca, un burro ou un rancho porcalleiro?
Ou habería algún animal máis no conto a quen botarlle as culpas?

UN ACCIDENTE

2012-01-25T12:28:00.001+01:00

Este mércores foron Manuel e máis Iago quen nos contaron o conto.
A protagonista é Andrea unha nena que pasa a fin de semana coa súa nai. De noite soña que vai nun tren antigo e moi longo, no que lle ocorren aventuras. Cando a esperta súa nai pola mañán...

CANDO MARTIÑO TIVO GANAS DE MEXAR NA NOITE DE REIS

2012-01-18T12:10:00.009+01:00

Outro mércores máis temos un contacontos. Nesta ocasión é Silvia e máis Ainhoa quen nolo conta.
Martiño, un neno moi ilusionado, coa chegada dos reis vai para a cama.Pero no medio da noite esperta cunhas ganas tremendas de mexar e... Menos mal que todos os contos rematan ben e o noso amigo Martiño consegue o seu tren máis un penico.

LIBROS PARA AGASALLAR

2011-12-24T16:00:00.005+01:00

Un ano máis aquí vos deixamos o tríptico de recomendacións de lectura para este Nadal. Foi elaborado grazas á colaboración das bibliotecas escolares do CEIP A.D.R Castelao, do CEP Xosé Mª Brea Segade, do IES Felix Muriel, do CEIP Ana Mª Diéguez e a B.P.M de Rianxo. Esperamos que lle saquedes bo proveito.

Open publication - Free publishing - More bibliotecas

UN PLANETA VERDE

2011-12-07T12:25:00.005+01:00

NO CONTACONTOS DE HOXE , OS NENOS DE 4º, FROILÁN, XAVI E RAMÓN ROMERO INVENTÁRONOS UN CONTO NO APARECÍAN UNHAS PEGADAS EXTRAÑÍÍÍSIMAS. DE QUE ERAN? TODO ACONTECÍA NUN PLANETA VERDE.

NA ÁRBORE.

2011-11-30T11:53:00.001+01:00

Hoxe os nenos/as de 1º: Isabel, Silvia e Abdi inventaron un conto. Uns nenos xogando cun balón, botárono enriba dunha árbore...

Podedes ó igual ca eles usar un pouquiño a imaxinación e contárnolo.

Contacontos OS CATRO AMIGOS.

2011-11-25T12:23:00.003+01:00

Esta semana, os nosos compañeiros Joel, Sergio e Daniela relataron un conto de catro amigos: un burro , un galo, un can e un gato un tanto cansos da súa vida cotiá. Entre os catro deciden vivir novas aventuras, incluso moi moi atrevidas. Interesante, non ? Pois este conto agárdache na nosa biblioteca.

XABI NON PODE DURMIR.

2011-11-16T12:21:00.003+01:00

Hoxe mércores, os nosos compañeiros Luismi, Sergio e Abel adentráronos no país dos soños perdidos para intentar darlle unha solución ó noso protagonista chamado Xabi. O pobre non podía durmir ben polas noites porque tiña pesadelos. Axudaríalle o Señor dos Soños?

XA ESTÁN AQUÍ OS CONTACONTOS DOS MÉRCORES!

2011-11-09T12:26:00.002+01:00

O primeiro conto deste curso foi do máis curioso, un home de barba azul !

Sabédelo título? ... BARBAZUL!

Era un home arrepiante!

Casouse con moitas mulleres que facía desaparecer ... ata que casou cunha un pouquiño máis lista ca el;

Interesante, verdade? Pois, anímate e participa ti tamén , igual que Lucía, Irene e Ismael, tódolos mércores na sesión do contacontos da nosa biblioteca.

As da noite

2011-11-02T20:05:00.004+01:00

Aquí tedes un video do contacontos de medo que os nenos e nenas de sexto!! A verdade é que daban moito medo!! houbo de todo... maquillaxe, vestiario e ata efectos sonoros!!

SAMAÍN

2011-10-24T16:46:00.002+02:00

Atrevidos e atrevidas, sodes quen de achegarvos á nosa biblioteca nesta semana de meeeeedo?

O samaín xa voltou.

O mércores día 26 de outubro, os nosos compañeiros/as de 6º contarán unha historia misteriosa que nos deixará o corpo arrepiado.

Uuuuuhhhhh!!! Ollo coas pantasmas.

Xa estamos de volta

2011-10-04T17:10:00.007+02:00

Con un pouco de retraso, ponse a andar de novo a nosa biblioteca. Esperamos que ao longo deste novo curso sigades participando coma sempre, asi que vémonos o vindeiro xoves 6 de outubro no primeiro sorteo das mochilas viaxeiras. Non faltedes á cita teremos novidades.

OS OFICIOS DE XAN

2011-06-18T18:51:00.002+02:00

Menudo era este Xan, gustáballe exercer unha grande cantidade de oficios, algúns deles fantásticos como o de creador de nubes, e outros mais mundanos como médico ou cociñeiro. Iago e Bruno xa terán claro ao que se queren adicar cando sexan maiores?.
Este foi o último "contacontos" por este curso, grazas a todas e todos pola vosa colaboración e entusiasmo.

O GATO CON BOTAS

2011-06-11T13:55:00.004+02:00

Olalla e Marta léronnos este conto clásico. Non sei si un gato coma este faría demasiado servizo nas nosas casas, pero seguro que co el non nos aburririamos e faríanos pasar uns bos "ratos", ji,ji,ji...

WINNIE THE WITCH

2011-05-26T22:00:00.005+02:00

Victoria e Coral contáronnos este conto en Inglés. Foron as nosas Bruxiñas boas para narrarnos as aventuras de Winnie, unha bruxa cunha casa negra, mobles negros e ata cun gato negro co que Winnie tropezaba a cada pouco. Farta de esmagalo por tódolos recunchos, cun pouquiño de maxia trocou a cor do gato. Agora era verde! O pobre do gato, desa maneira, perdeuse no campo. E Winnie tivo que voltar a usala maxia para poñelo multicolor e atopalo. Pero como con tantas cores, ata os paxaros se rían do micho, Winnie, decidiu voltar a darlle a cor negra. Para distinguir ao animaliño entre tanta negrura tinguiu a casa de moitas cores. E o gato foi de novo un gatiño negro coma o de tódalas bruxas dos contos.

Ramón Caride

2011-05-23T22:49:00.004+02:00

A pasada semana visitounos Ramón Caride, o escritor de obras como "Xan Farrapeiro" ou "Bertiño Rompetodo". Entre anécdotas e autógrafos pasou axiña o tempo pero hai que felicitarvos a tod@s porque lle fixestes preguntas moi interesantes e ata propuxestes algunha boa idea de próximos títulos para que poña en marcha. E... quen sabe!... ao mellor poderemos ler de contado As Aventuras de Xan Muíñeiro...
Por certo, non estivemos sós, acompañáronnos neste encontro os nen@s de Taragoña.

LOIS PEREIRO

2011-05-18T00:09:00.003+02:00

Este ano adicoúselle o Día das Letras Galegas a Lois Pereiro.
Aquí vos deixamos un dos poemas deste poeta o que chamaron o poeta punk.

Tristemente convivo coa túa ausencia

sobrevivo á distancia que nos nega

mentres bordeo a fronteira entre dous mundos

sen decidir cal deles pode darme

a calma que me esixo para amarte

sen sufrir pola túa indiferencia

a miña retirada preventiva

dunha batalla que xa sei perdida

resolto a non entrar xamais en ti

pero non á tortura de evitarte.

III CERTAME LITERARIO

2011-05-17T23:43:00.003+02:00

O venres 13 rematou o prazo para a presentación de contos elaborados polo alumnado.
Sodes tod@s uns grandes escritores! Moitas grazas pola vosa colaboración no III Certame Literario.
Pronto recibiredes un estupendo agasallo!

O PASTOR RAÚL

2011-05-11T23:47:00.000+02:00

Neste mércores Contacontos, Adrián de 5º narrounos a historia dun pastor que un día marchou do campo á cidade para cambiar de aires. Malia isto, as súas ovellas nin pensaban en cambiar de pastor e seguíano por todos os recunchos. Así lograron que voltase aos prados. Pero o pastor deixara na cidade algo pendente...
Moi ben por Adrián que nos contou tan estupendamente esta historia de ovellas!

PUNTO LIBRO

2011-05-04T23:06:00.003+02:00

Os libros da Biblioteca van de viaxe!!! Mirastes ben todos os rincóns do cole? Xa chegou Punto Libro! Nos corredores, nas escadas, rubindo polas paredes... libros a moreas agárdanvos en todos os recunchos. Os libros que atopedes no punto libro devecen por iren para as vosas casas pero non esquezades voltar a poñelos no seu lugar para que emprendan de novo a viaxe a outros fogares, xa que os libros están de vacacións lonxe da Biblioteca. Boa viaxe!

LEOCHE UN LIBRO

2011-04-27T22:16:00.007+02:00

Traemos boas novas! Hoxe no recreo tivemos unha gran sorpresa! Empezou a actividade "LEOCHE UN LIBRO". Con esta iniciativa podemos xogar tan contentos no patio e escoitar contos estupendos narrados polos mozos e mozas de 5º e 6º.
Se queredes escoitar un conto non tedes máis que pedirllo a algún "Contador/a de contos".
Buscade polo patio os petos de cores que poñen nas costas "Contador/a de contos" e non vos esquezades de dar as grazas cando vos conten un conto. Que sorte!!!!

UNS RATOS INSOPORTABLES

2011-04-13T23:01:00.003+02:00

Neste último Mércores antes das vacacións, Sergio e Iago déronnos a oportunidade de escachar coa risa grazas ao conto "Uns ratos insoportables". Os devanditos ratos tiñan farto dabondo ao gato da casa, que non paraba de escoitar a mofa dos dous individuos. Canso de tanta leria, o gato argallou unha trampa na que os ratiños caeron coma papóns... Marramiauuuuuuu!

Tento e maila cadea

2011-04-06T16:11:00.004+02:00

No recreo de hoxe Uxía e Fani contáronnos unha das trasnadas de Tento. Este can non para! Desta volta ocurriúselle poñerse ao pescozo unha cadea para sentirse especial. Axiña viu que aquelo de especial non tiña nada e argallou a forma de verse de novo libre... E é que ceibo é como mellor se está!
Moi ben polas nosas Contacontos! Graciñas pola vosa colaboración!

O DRAGÓN COMEMEDO

2011-03-30T21:41:00.003+02:00

Ramón Castelo, Ramón Romero e Froilán, contáronnos no recreo de hoxe un conto moi entretido. Falaba dun dragón, pero non dun dragón corrente... Era un dragón comemedo! Imaxinas ter por amigo a un ser así? Pois iso foi o que lle aconteceu a Bernal, que era moi medorento ata que o dragón se pegou unha boa fartada co seu medo. Así que, cando andes pola rúa, xogues nas cabanas ou enredes no patio, anda con tino de non pisar a cola do dragón comemedo, que é un dragón boíño!

BARBAZUL

2011-03-23T22:38:00.013+01:00

Neste Mércores Contacontos, Bruno agasallounos cun conto cheo de misterios:

- Un home coa barba azul...

- Que casara con varias esposas e non sabía o que facía con elas...

- Un cuarto que non se podía abrir porque agochaba un segredo...

- Unha chave encantada...

Andivemos moi intrigados ata que Bruno leu o final. Gustounos moito este conto!Moi ben Bruno! E se alguén non o escoitou lembrade que na vosa Biblioteca tedes títulos tan misteriosos e arrepiantes coma este. Aquí deixamos as imaxes!

PETER PAN

2011-03-16T22:24:00.005+01:00

Paula e Antía contáronnos no recreo o conto de Peter Pan.
Collidos da man de Peter Pan puidemos voar ata o País de Nunca Xamais con Wendy e os seus irmáns para vivir unha fantástica aventura.
E aínda que ao final do conto todos regresan as súas casas, recordade que sempre teremos un lugar onde xogar ao lado de Peter Pan e a súa pequena fada.
Moitos parabéns para Paula e Antía por contarnos este conto clásico que nunca, nunca pasa de moda!

O PAÍS DOS MANDÓNS

2011-03-02T22:26:00.004+01:00

Aínda que nos vexades a todos en pixama, non pensedes que este é o conto de antes de durmir... Hoxe Sergio e Luismi contáronnos unha historia con mensaxe. O conto trata dun país gobernado por un mandón. Neste país as mulleres facían todo o traballo e os homes non podían facer o que querían. Por iso todo o mundo estaba anoxado. Un día decidiron protestar e o país dos mandóns trocou de rumbo. Sergio e Luismi fixérono moi ben e ademais de entreternos con este interesante conto ensináronnos unha lección de igualdade.E aínda que todos estabamos preparadiños co pixama para pechar o ollo prometémosvos que a ninguén lle pegou o sono cos nosos dous amigos. De seguido, as fotos e o video:

NAVEGA, CARACOL!

2011-02-28T23:06:00.005+01:00

Nun deses días de choiva, en que non sabemos que facer, a Caracol ocurriúselle botarse á auga montado nunha folla. Estaba agochadiño ata que sentiu as ras aprendendo a croar ensaiadas por Ra. Pronto Caracol croaba mellor ca elas mesmas. As cinco raíñas remataron cantando coma un xílgaro animadas por Caracol. E xa que falamos de raíñas... Sabedes quen foi a raíña do mércores? Non hai dúbida mozos/as, foi SILVIA a pequeniña que nos contou marabillosamente esta historia de Navega, Caracol!! Dende a Biblioteca mandámoslle moitísimos parabéns!! Unhas fotos para lembrarnos...

E para os que non estiveron alí deixamos a actuación da excelente contacontos:

CARACOL E VERMIÑO

2011-02-16T23:32:00.003+01:00

Hoxe no recreo tivemos a oportunidade de escoitar as máis pequeniñas de tod@s os que participastes ata agora nos Mércores Contacontos: Daniela e Lorena.
E como de pequeniños vai a cousa os protagonistas do conto eran un caracol e un vermiño enfrontados por unha folla de leituga. Tivo que vir unha pomba lambona para que caracol e vermiño se deran conta de que podían compartir o banquete.
Aínda que as verdadeiras protagonistas hoxe foron Daniela e Lorena, fixérono moi ben!!! Contounos un paxariño que as dúas ensaiaron moito e nótase. Boa conta diso poden dar todos os que alí se achegaron. Escoitastes ben o aplauso??

A MIÑA AMIGA A ESCURIDADE

2011-02-09T22:20:00.003+01:00

Algunha vez tremestes na escuridade?...
Sentistes medo das sombras arrepiantes da noite?...
Pois a protagonista deste conto adicábase a bailar ca escuridade que entraba pola fiestra da súa habitación.
Silvia e Elio contáronnos fabulosamente este conto fantástico. Grazas aos dous por facernos pasar un intre agradable e por darnos ideas: alguén se anima a xogar ca escuridade?
Mentres o pensades aquí colgamos as fotos do conto.

Safari

2011-02-03T00:05:00.004+01:00

No día da candeloria, Lara e Katia leváronnos de Safari. Con este título vivimos unha boa aventura, todo contado en forma de poema. Grazas mozas pola vosa colaboración nos Mércores Contacontos!

A figueira de Pelostortos

2011-01-26T22:20:00.007+01:00

Unha semaniña enteira foi o que tivemos que agardar para que nos contaran outro conto. E valeu a pena!
Bernal, Victoria e Xulián escolleron o título:"A figueira de Pelostortos" para poñernos a pel de galiña. E é que Pelostortos tiña unha figueira da que non deixaba que ninguén comera. Prefería que o visitasen as almas en pena que compartir os figos da súa figueira. E abofé que as almas en pena o visitaron, e Pelostortos tivo que escapar co medo. As almas só eran os disfraces de 2 nenos e unha nena moi espelidos que conseguiron comer da figueira.
Deixámosvos de seguido as fotos e o vídeo dun anaco de conto para que vexades que ben o fixeron os nosos 3 narradores.

ADIVIÑA, ADIVIÑANZA...

2011-01-19T23:24:00.005+01:00

Fixástesvos na entrada da Biblioteca?
Gústanvos os nosos carteis dos Mércores Contacontos?

Dende a Biblioteca queremos plantexarvos unha adiviña singular:
Quen será, quen será
a persoa ou persoeiro
que cada nova semana
o cartel deseñará?

Cavilade a ver quen o acerta!
Pronto teredes a resposta...

A BRUXA REGAÑADENTES

2011-01-19T21:57:00.004+01:00

Hoxe no recreo grazas a Coral e Sandra, que nos contaron este fabuloso conto, voamos ca nosa imaxinación a un bosque onde se perderon 3 irmáns para acabar na casa dunha bruxa con dentes de ferro. A astucia do máis pequeno dos irmáns deixounos un final feliz!
Aquí colgamos as fotos deste primeiro conto dos Mércores Contacontos.
Fabuloso mozas! Merecedes un gran aplauso!!

Contádesnos un conto?

2011-01-18T08:14:00.006+01:00

Xa chegou o gran intre que todos agardávamos!
Un ano máis na vosa Biblioteca chegan os Mércores Contacontos. Un acontecemento no que vós sodes os grandes protagonistas.
Pero... Que é ese barullo que escoitamos? É Merlín batendo as ás preparándose para aplaudirvos.
Animádevos a participar!!
Seguro que o facedes fenomenal!!

RECOMENDACIÓNS DE NADAL

2010-12-28T22:40:00.006+01:00

Este ano queremos compartir con tod@s as propostas de lectura confeccionadas pola maioría das bibliotecas escolares do noso concello e a biblioteca pública municipal. Son unhas recomendacións que mostran o noso compromiso conxunto coa lectura desde a infancia á idade adulta.

Desexámosvos felices festas e felices lecturas en familia.

Open publication - Free publishing - More rianxo

TOC, TOC...

2010-12-20T00:23:00.004+01:00

- TOC, TOC, pódese?
É o que nos di este personaxe que chega no Nadal para quedarse con nós. Trátase do Apalpador: un home de barba rubia, un vello xigante, que vive nas devesas das altas montañas facendo carbón durante todo o ano para escorrentar o frío do inverno. No seu tempo libre o Apalpador fai xoguetes artesanais con madeira, pedra, cartón... Non ten nadiña que envexar a Papa Noel ou aos Reis!!!
Se queredes saber máis, na Biblioteca atoparedes axiña o libro "Antón e o apalpador". E ademais abride ben os ollos porque o Apalpador espéravos tódolos días na entrada do cole. Nos vos esquezades de darlle os bos días!!

Xa estamos de volta!

2010-11-14T23:11:00.002+01:00

Co comezo do curso a Biblioteca abre as súas portas para que vos mergulledes en moreas de libros.

Tivestes que agardar un anaquiño pero de seguro que estades tan emocionados coma nós ca posta en marcha da mochila viaxeira... Xa está nas vosas casas!
Aquí deixamos as fotos do primeiro sorteo.

E xa sabedes: "Para viaxar lonxe, non hai mellor nave que un libro" (Emily Dickinson)

Chegaron as vacacións

2010-06-20T20:37:00.003+02:00

Rematou o curso, xa chegaron as vacacións. Dende a biblioteca vos desexamos que pasedes un bo verán, que gocedes das vosas familias, que vaiades moito a praia e por suposto que sigades lendo. Marlin estaravos esperando cando comece o próximo curso. Bicos para tod@s.

O Agasallo do Anano

2010-06-20T20:12:00.004+02:00

Seguro que moitos de vós paseades polo monte cando fai bo tempo, atopastes algún anano? Pois Ainhoa si. Polo que parece inspirouse neste encontro para escribir o conto. O certo é que foi un anano moi agradecido.

A salvación de Elena

2010-06-09T18:45:00.002+02:00

Diana e unha rapaza que traballa de exploradora. Así comeza a aventureira historia que escribiu Estrela. Cartas que chegan por outra vía que non é a habitual, animais que atacan aos humanos, viaxes en avioneta... Esta historia está chea de aventuras!.

Visita de Ramón Carredano

2010-06-01T16:27:00.013+02:00

Para rematar o mes de maio visitounos na nosa biblioteca Ramón Carredano Cobas. Autor entre outras obras de "Unha branca de cobre para Martiño" coa que estiveron traballan @s de terceiro ciclo neste trimestre. Martiño na Noiteboa bebe un grolo de champán e cando desperta atopase a bordo da Santa María, a nao do almirante Cristovo Colon. O grumete Martiño e o seu papagaio Trinquete vivirán unhas xornadas inesquecibles, farán amigos e inimigos, e deberán vencer problemas case insuperables. Estivo Martiño na Santa María ou so foi un soño?...

Asesinato no Madame Úrsula

2010-05-29T18:25:00.006+02:00

Aldara e Victoria explícannos como chega un novo caso a axencia de detectives Dobre A. Non sempre as vacacións son tan tranquilas como as planeamos, pero si que resultan sempre interesantes.

A lenda do lago

2010-05-26T18:39:00.005+02:00

Sabedes porque existen os humanos?. Así comeza esta inquietante historia na que Clara, Ana e Aida nos conta a súa particular visión de como os humanos temos moito que ver con todos os animais que coñecemos.

Día das letras

2010-05-16T18:25:00.003+02:00

Como todos os anos, o día 17 de maio celébrase o Día das Letras Galegas. Escolleuse este día por ser nel no que se editou por primeira vez o libro de Rosalía de Castro "Cantares Gallegos". Cada ano a Real Academia Galega designa a un autor ou autora que escribiu na nosa lingua. Este ano adícaselle ao poeta do Caurel Uxío Novoneyra. Si queres saber algo máis del pica nas ligazóns que tes ao lado.

Exposición de libros

2010-05-13T08:09:00.004+02:00

Durante estas dúas semanas o corredor diante da biblioteca encheuse de libros un pouco usados. Todos coñecemos a "Kika Superbruxa" a "Harry Potter" ou a "Tento" pero eles non estaban, no seu lugar tiñamos a "Los cinco", "El capitán trueno", "Mortadelo y Filemón" e moitos máis títulos cos que pasaban o seu tempo os vosos pais e avós cando tiñan a vosa idade. Tamén había libros de texto, que distintos aos de agora!, podías aprender a ler nunha semana!. Houbo moitas cousas que vos chamaron a atención, polo distintos que son cos que se usan agora. Acariñade os vosos para que nun futuro poidan gozar deles outros nenos e nenas próximos a vós.

A vida dunha nena que quería soñar baixo a lúa

2010-05-13T08:03:00.006+02:00

Neste pequeno relato Rita acordase dunha nena que ten unha deficiencia física, o que lle dificulta facer algunha actividade como aos demais nenos. Coa axuda da súa familia, conseguira o que tanto ansía?.

As aventuras dos tres irmáns piratas

2010-05-12T19:30:00.007+02:00

Sandra, Xulián e Coral faláronnos de tres irmáns aos que un pirata desalmado deixara sen pai. Tiveron que esperar ata que cumpriron os dezaoito anos para poder vingar a súa morte. Comezaron unha serie da aventuras na que se enfrontan a Barba Negra e aos seus secuaces pero finalmente saen vitoriosos.

La Fantasía de las Muñecas

2010-04-28T17:17:00.007+02:00

Esta é a historia coa que Ismael e Manuel participaron no Certame Literario.Quixeron contárnola a todos e ata sacaron a unha espectadora a bailar.

Semana importante na biblioteca

2010-04-24T22:37:00.003+02:00

Durante esta semana a nosa biblioteca estivo chea de actividade. Durante todos os recreos tivemos un obradoiro de caraveis ao que nunca lle faltaron participantes. Tamén celebramos o II Certame Literario no que, seguindo coa nosa tradición, todos os participantes tiveron uns agasallos. E como remate repartíronse os caraveis entre todas as persoas do centro.

23 de Abril Día do Libro

2010-04-20T09:04:00.008+02:00

Coa celebración deste día no mundo enteiro, a UNESCO pretende fomentar a lectura, a industria editorial e a protección da propiedade intelectual por medio dos dereitos de autor.
Elixiuse o 23 de abril para a súa celebración porque coincide co falecemento de dous escritores universais, MIGUEL DE CERVANTES e WILLIAM SHAKESPEARE.
Cada ano unha cidade do mundo convértese na capital mundial do libro. No 2010 será Ljubljana que está en Eslovenia.
Este é o cartel deseñado este ano para a celebración deste día; está escrito en Francés e Inglés.

Mariluz Avestruz

2010-04-14T09:00:00.005+02:00

Estrela narrounos a historia de Mariluz, unha avestruz da sabana africana que pola noite, non dorme como os demais avestruces. Este costume vai ocasionarlle problemas e ensinaralle que o máis importante non é o aspecto físico...

Croco

2010-04-11T21:39:00.005+02:00

Ana e Clara contáronnos esta historia.

Croco morría de fame, pero mamá crocodila tiña que vixiar o niño. No niño había un ovo e no ovo… un irmán. Croco marchou disposto a cazar só, pero aínda era algo pequeno e non estaba afeito a ter que buscar a súa merenda.

Fomos ao teatro

2010-03-20T21:00:00.005+01:00

O pasado xoves 18, os nenos e nenas de Infantil e primeiro ciclo de Primaria, asistimos no Auditorio Municipal de Rianxo, á representación, por parte do grupo de teatro BABALUVA, do libro de Alberto Varela Ferreiro ¡LUME!. Ata alí achegáronse tamén nenos e nenas doutros centros do concello. Na nosa biblioteca atoparás outros títulos deste autor que tivemos a sorte de que nos visitara hai dous anos.

Uxía no verán

2010-03-20T19:26:00.000+01:00

Yolanda e Xulián xa teñen ganas de sol e de praia por iso escolleron este pequeno conto.

É verán e Uxía ten que prepararse: roupa cómoda, gorra e crema para o sol, e a pasalo ben!

O zapateiro e os trasnos

2010-03-20T19:22:00.000+01:00

Foi Victoria a que nos contou esta historia.

Non lles quedaba máis coiro, e espertaron cunha sorpresa...

Aquel neno e aquel vello

2010-03-20T19:15:00.000+01:00

Andrés e Daniel ensináronnos que non hai mellores amigos que un neno e un vello.

Aquel neno tiña uns pais que nunca estaban con el.

Aquel vello xubilárase e estaba só.

Contacontos de Febreiro

2010-03-14T17:20:00.003+01:00

Aldara e Estrela léronnos Sígueme! Unha gran historia de amor que non ten nada de raro.

Superar dificultades cooperando entre un grupo amigos foi o que nos contaron as máis benxaminas das nosas lectoras con El viaje en globo. Uxía, Lara e Fani foron quen de manter a atención de todo o grupo que foi a escoitalas.

O traballo ten a súa recompensa e así nolo fixo ver Coral cando nos leu esta historia de orixe italiana A casa dos gatos.

Martes contacontos

2010-03-14T16:59:00.002+01:00

Comezamos en febreiro a adicarlle un anaquiño do recreo a pasar pola biblioteca e compartir as nosas pequenas lecturas con todos e todas as que nos queiran escoitar. Si aínda non te apuntaches pasa pola biblioteca e anímate. Non tes porque facelo só. Podedes ser ata un grupo de tres.

XA ESTAMOS AQUÍ!!!

2010-03-10T09:06:00.004+01:00

A Biblioteca non podía ser menos. Nace o voso blogue para que participedes nel tanto, como o facedes en todas as actividades que vos propoñemos.Non esquezades dicirllo as vosas familias e que nos deixen tamén os seus comentarios.